الممرات المائية | مضيق باب المندب... بوابة البحر الأحمر إلى العالم

مضيق باب المندب موجود بين اليمن بقارة آسيا، وجيبوتي وإريتريا بقارة أفريقيا، وبيربط البحر الأحمر بخليج عدن، ومنه إلى بحر العرب والمحيط الهندي. ولهيك بيُعتبر من أهم الممرات البحرية بالعالم، لأنو أي سفينة بدها تنتقل من آسيا وأوروبا عبر قناة السويس لازم تمر فيه بالأول.

قديش حجمه؟

يبلغ طول المضيق نحو32 كيلومترًا، أما عرضه عند أضيق نقطة فبيتراوح بين26 إلى 30 كيلومترًا. وبتقسّمه جزيرة بريم (ميون) إلى ممري بحريين:

الممر الشرقي المعروف بباب إسكندر، عرضه حوالي 3 كيلومترات، وهو ضحل نسبيًا. أما الممر الغربي، المعروف بدقة المايون، فعرضه حوالي 25 كيلومترًا، وهو الأعمق والأوسع، لهيك بتستخدمه أكتر السفن التجارية.

كيف تشكّل؟

تشكّل مضيق باب المندب بشكل طبيعي قبل ملايين السنين، نتيجة تغيّرات كبيرة شهدتها الأرض أدت لانفصال قارة آسيا عن أفريقيا. ومع تغيّر مستوى البحار عبر العصور، أخد المضيق شكله الحالي، وصار واحد من أهم الممرات البحرية بالعالم.

ليش اسمه "باب المندب"؟

في أكتر من رواية عن سبب التسمية، لكن الأشهر إنو اسم باب المندب يعني باب الدموع أو باب الحزن، بسبب صعوبة الملاحة فيه قديمًا وكثرة حوادث غرق السفن. في رواية تانية بتقول إنو الاسم مرتبط بزلزال قديم فصل بين قارة آسيا وأفريقيا، وأدى لسقوط عدد كبير من الضحايا، بس ما في دليل قاطع بيأكد هالرواية.

ليش هو مهم؟

يُعتبر باب المندب من أهم شرايين التجارة العالمية، لأنه بيربط المحيط الهندي بالبحر الأحمر، ومنه إلى قناة السويس والبحر المتوسط. وبيمر عبره جزء كبير من شحنات النفط والغاز والبضائع يلي بتتنقل بين آسيا وأوروبا.

وأي توتر أو اضطراب فيه ممكن يجبر السفن على تغيير مسارها والالتفاف حول رأس الرجاء الصالح بجنوب أفريقيا، بدل المرور عبر قناة السويس، وهالشي بطوّل الرحلة، وبيزيد كلفة الشحن والتأمين، وبيأثر على حركة التجارة العالمية.

مين بيعتمد عليه؟

بيعتمد على المضيق عدد كبير من الدول، لأنو ممر اساسي للتجارة بين آسيا وأوروبا. وبتستخدمه دول الخليج لتصدير جزء من النفط والغاز إلى أوروبا، وبيعتمد عليه الدول الأوروبية لاستيراد النفط والغاز والبضائع من آسيا. وكمان بتمر عبره شحنات تجارية ضخمة بين الصين والهند ودول شرق آسيا من جهة، وأوروبا من جهة تانية.

شو أبرز الثروات بالمنطقة؟

المنطقة المحيطة بالمضيق منا غنية بالنفط والغاز مثل مضيق هرمز، لكن ثروتها الحقيقية هي موقعها الاستراتيجي. فالمضيق يقع على واحد من أهم طرق التجارة البحرية بالعالم، وبيمر عبره جزء كبير من حركة الشحن الدولية. وبتتميز المنطقة بثروة سمكية كبيرة، وبتضم موانئ مهمة على ضفتيه.

ليش بيتكرر اسمه بالأخبار؟

تكرر اسم باب المندب بشكل كبير خلال السنوات الأخيرة بسبب الحرب في اليمن والهجمات يلي استهدفت السفن التجارية في البحر الأحمر. وهالتطورات دفعت عدد من شركات الشحن لتغيير مسار سفنها بعيدًا عن البحر الأحمر، وهيدا الشي تسبب بارتفاع تكاليف النقل والتأمين وتأخير وصول البضائع إلى الأسواق العالمية.