مضيق هرمز... الممر البحري اللي بيحرّك أسواق الطاقة

كل مرة بيتصدر فيها مضيق هرمز الأخبار، بتبلش أسعار النفط تتحرك. والسبب إنو هالممر البحري الصغير بيعتبر من أهم شرايين الطاقة بالعالم.

وين موجود مضيق هرمز؟

مضيق هرمز موجود بين الخليج العربي وخليج عُمان، وهو البوابة الوحيدة اللي بتربط الخليج بالمحيط الهندي وبحر العرب. من الجهة الشمالية بتطل عليه إيران، ومن الجهة الجنوبية سلطنة عُمان، وتحديدًا محافظة مسندم التابعة إلها، وكمان قريب من دولة الإمارات العربية المتحدة.

قديش حجمه؟

بيبلغ طول مضيق هرمز حوالي 167 كيلومترًا، أما عرضه فبيتراوح بين نحو 39 و95 كيلومترًا. بس السفن ما بتمرق من أي محل بالمضيق، بل من ممرات مخصصة. كل ممر عرضه حوالي 3.2 كيلومترات، وفي واحد للدخول وواحد للخروج، وفيه بيناتهن منطقة فاصلة، لهيك أي حادث أو توتر فيه ممكن يأثر بسرعة على حركة السفن.

كيف تشكّل؟

مضيق هرمز هو ممر طبيعي تشكّل عبر ملايين السنين بسبب الحركات الجيولوجية يلي أثرت عالمنطقة، خصوصًا مع تشكّل جبال زاغروس بإيران. ومع ارتفاع وانخفاض مستويات البحار عبر العصور، أخد المضيق شكله الحالي، وصار المنفذ البحري الأساسي لدول الخليج.

ليش اسمه "هرمز"؟

اسم المضيق مأخوذ من مملكة هرمز التاريخية، وهي مملكة بحرية ازدهرت بين القرنين ال 13 وال 16، وسيطرت على جزء كبير من حركة التجارة البحرية بالخليج العربي والمحيط الهندي. وكانت جزيرة هرمز وقتها محطة أساسية للتجارة بين الشرق والغرب، قبل ما يحتلها البرتغاليون سنة 1507، ويرجع الصفويون يستعيدوها بمساعدة الإنجليز سنة 1622.

ليش هو مهم لهالدرجة؟

أهمية مضيق هرمز بتجي من كونه شريان الطاقة بالعالم. فجزء كبير من صادرات النفط والغاز من دول الخليج بتمرق عبره قبل ما توصل للأسواق العالمية. وبتستخدمه السعودية والعراق والكويت وقطر والإمارات وإيران لتصدير قسم كبير من إنتاجها النفطي، وبتعتمد عليه قطر لتصدير معظم الغاز الطبيعي المسال.

وبيمر عبر المضيق يوميًا حوالي خُمس النفط بالعالم، وكميات ضخمة من الغاز الطبيعي المسال، لهيك أي توتر أمني أو عسكري أو سياسي فيه بينعكس مباشرةً على أسعار النفط، وبزيد كلفة الشحن والتأمين، وبيأثر على الاقتصاد العالمي.

مين بيعتمد عليه؟

بيعتمد على مضيق هرمز عدد كبير من الدول، وأكثرها دول آسيا، مثل الصين والهند واليابان وكوريا الجنوبية، لأنها بتستورد جزء كبير من احتياجاتها النفطية من الخليج. وبالمقابل، بتعتمد عليه الدول الخليجية نفسها لأنه المنفذ البحري الأساسي لصادراتها.

شو أبرز الثروات بالمنطقة؟

المنطقة المحيطة بالمضيق من أغنى مناطق العالم بالنفط والغاز. فدول الخليج بتمتلك نسبة كبيرة من احتياطيات الطاقة العالمية، وبتضم حقول غاز عملاقة، أبرزها حقل الشمال بقطر وحقل بارس الجنوبي بإيران، وهني بالأساس حقل واحد مشترك بين البلدين، ويُعد أكبر حقل غاز طبيعي معروف بالعالم.

ليش بيتكرر اسمه بالأخبار؟

لأن مضيق هرمز كان محور لكتير من الأزمات خلال العقود الماضية، مثل حرب الناقلات بالثمانينيات القرن الماضي، والهجمات على ناقلات النفط، والتوترات بين إيران والولايات المتحدة، والتهديدات المتكررة بإغلاقه. ومع كل أزمة، بيرجع اسمه يتصدر الأخبار، لأن أي توتر فيه ممكن يأثر على أسعار النفط وحركة التجارة العالمية.