ليه اخترقت الفضة 100 دولار وشو علاقة الذكاء الإصطناعي؟
تجاوزت أونصة الفضة 100 دولار لأول مرة بالتاريخ وبلغت أعلى المستويات من عام 1980. وأكيد تزامن إرتفاع سعرها مع سعر الذهب يلي تجاوزت الأونصة فيه 5000 دولار.
المعدنين من عام 2025 لغاية 2026 بعدهم عم يرتفعوا ويسجلوا مستويات قياسية بظل تهافت المستثمرين على شراء المعادن الثمينة كونها أكثر الطرق آمان بالوقت الحالي للإستثمار.
أسباب أدت لإرتفاع أسعار المعادن كانت بال 2025 عديدة وأكيد التحولات يلي صارت ب 2026 زادت من فرص الإرتفاع.
بدايةً وحدة من أبرز العوامل يلي ساهمت بإرتفاع أسعار المعادن عام 2025 هي تخفيض البنك المركزي الأميركي الفائدة ثلاث مرات بعام واحد، ومع تخفيض الفائدة بتتراجع العملة بالتالي تراجع الدولار مما دعا المستثمرين للجوء لإستثمارات أكثر أمان يلي هي المعادن. وإذا قرأناها بمعادلة حسابية بسيطة كل ما زاد الطلب على المعادن وقلّ المعروض، المصنعين بيصير عليهم ضغط أكبر لتلبية الكمية، وهيدا الشي طبيعي بيخلّي السعر يرتفع.
معلومة صغيرة قبل ما نكمل، بتعرفوا إنو رغم الإرتفاع الكبير يلي سجله الذهب إلا إنو الفضة إرتفع بنسبة أكبر بكتير بحيث سجلت الفضة إرتفاع بنسبة 158% من بداية العام 2025، والذهب 72% تقريباً.
وأكيد ما فينا ننسى التوترات الجيوسياسية يلي أثرت على العالم بشكل كبير بدءاً من المفاوضات لحصول هدنة بين روسيا وأوكرانيا، لإختطاف الرئيس الأميركي دونالد ترامب الرئيس الفنزويلي نيكولاس مادورو ورغبت الأميركي بالاستثمار والسيطرة على النفط الفنزويلي، وصولاً لرغبة الأميركي بالسيطرة على عدة دول أوروبية منهم غرينلاد.
طيب ليش الفضة إرتفع بهالشكل وشو علاقته بالذكاء الإصطناعي؟
بعاني سوق الفضة من عجز متواصل بين الإنتاج العالمي والطلب الصناعي. الفضة ما منعتبره بس طريق للإستثمار إنما هو معدن أساسي بالعديد من الصناعات وأبرزها صناعة الشرائح الإلكترونية أي "الرقائق" يلي بتعتمد عليها شركات الذكاء الإصطناعي بشكل كتير كبير.
كمان ُتستخدم الفضة بتصنيع الموصلات الكهربائية والدوائر المطبوعة، غير إنو أجهزة الذكاء الإصطناعي بتحتاج لمعالجات قوية، ووحدات تخزين وأجهزة إستشعار، وكل هاي الأدوات بتحتوي على الفضة.
وبظل إنو عم نعيش بعالم الرقمنة هلأ، طبيعي يزيد الطلب بشكل هائل من قبل الشركات المصنعة على الفضة، وهون منرجع للمعادلة يلي ذكرناها فوق: كل ما زاد الطلب، كل ما ارتفع السعر.
ومن ضمن الصناعات يلي بيدخل فيها الفضة هي تطبيقات AI في الروبوتات، السيارات الذكية، والطائرات بدون طيار يلي بتحتاج أجهزة تحكم كهربائية دقيقة بتعتمد على الفضة بالدوائر، وكمان الطاقة الشمسية.
باختصار، تخطي الفضة حاجز الـ100 دولار مش صدفة، بل نتيجة تلاقي عدة عوامل اقتصادية وسياسية وصناعية. ويلي بميز الفضة عن الذهب بهيدا الارتفاع هو ارتباطها المباشر بالعالم الرقمي والذكاء الاصطناعي. وبظل هيدا التزاوج بين الاستثمار الآمن والحاجة الصناعية المتزايدة، يبدو إنو الفضة رح ستستمر بتسجيل مستويات قياسية خلال الفترة الجاي.
