إذا احترق لسانك يعني إنت كذاب... شو هوّي طقس البَشَعة؟
البَشَعة هو مصطلح غريب بعبّر عن واحد من الطقوس المصرية القديمة بس شو بيعني؟
هو طقس بيرجع لقبائل بدوية بحنوب سيناء كانوا يستخدموا بالعقود القديمة وبعدين إنتقل لعدة مناطق مثل الصعيد وبعض بلاد الشام.
القصة وما فيها إنو وقت يكون في خلاف معيّن وبدهم يكشفوا إذا الشخص صادق أو كذاب بيستعينوا بشخص إسمه المبشّع هيدا الشخص بحمّي قطعة من الحديد على النار أو الجمر لدرجة حرارة كتير عالية، وبيرجع بيحطها على لسان المتهم 3 مرات وإذا إحترق لسان المتهم يعني هو كذاب أما إذا ما صرلوا شي يعني صادق. وبيعتقدوا إنو الشخص يلي بيكون كذاب بيرتفع عنده معدل التوتر وبيأدي لنشفان في اللسان وبالتالي بيحترق لسانه، أما الشخص الصادق فلسانه بيحافظ على رطوبته لأنه بيكون مأكد من براءته ومرتاح ووقت يحطوا قطعة الحديد السخنة ما بيحترق وبيعلنه براءته من التهمة.
أما شرعاً فبأكد دار الإفتاء المصري والأزهر الشريف إنو هاي العادة محرمة شرعاً وما إلو أصل بالشريعة الإسلامية. كمان يعتبر إنو بعرّض الإنسان للضرر والخطر وهيدا الشي بيخالف الشريعة الإسلامية يلي بتشدد على حفظ كرامة الإنسان والنفس. ويعتبر شكل من أشكال الدجل والكهانة.
وقانونياً فهيدي العادة تعتبر إعتداء على منظومة العدل الرسمية وغير معترف فيه قانونياً.
إنتوا لو كنتوا متهمين بموضوع معيّن كنتوا رح تقبلوا تعملوا طقس البشعة لتثبتوا برائتكم يا ترى؟