شو يعني عيد الشكر؟

كل سنة منسمع عن إحتفال بعيد الشكر ولكن شي مرة سألنا شو أساسه عيد الشكر؟ وليه عدة دول بالعالم، خاصة بأميركا وكندا، بتحتفل بهل يوم؟

القصة وما فيها إنو هاليوم هو مخصص لشكر ربنا على النعم يلي عاطينا ياها وتذكيراً قديش غامرنا بكرمه ولطفه، و كمان بعبّر فيه الناس عن شكرهم لله عالنعم والحصاد.

وبيرجع تاريخه لأوائل قرن الـ17 بعد ما بلّشت هجرة الأوروبيين للقارة الأميركية هروباً من إضطهاد الكنيسة الإنجليزية لإلهم.

بهيداك الوقت كانت خبرة الإنكليز ضعيفة بالزراعة والصيد لوقت ما ساعدهم واحد من الهنود الحمر. وبعدها عملوا إحتفالات لمدة 3 أيام دعوا فيها الهنود الحمر ليشكروهم، كمان عملوا احتفال بعد موسم الحصاد ليشكروا فيه ربهم على النِعم.

أيمتى بيحتفلوا فيه؟

بأميركا الشمالية، عيد الشكر هو رابع خميس من شهر تشرين الثاني/نوفمبر، ومعروف هيدا العيد بوجبة الديك الرومي الأساسية، وبيجي بعده يوم "الجمعة السوداء".

شو علاقة الديك الرومي بهالعيد؟

لهل قصة عدة روايات منها:

الرواية الأولى بتقول انو أميركا كانت مليانة دْيوك رومي برّية فكان خيار سهل ورخيص ومتوفّر للعائلات.

اما الرواية التانية إنّو الملكة إليزابيث أكلت ديك رومي لمّا سمعت إنّو سفُن إسبانيّة كانت رايحة تهاجم بريطانيا غرقت، والإنجليز أخدوا الفكرة وانتقلت معهم على أميركا.

ومع الوقت صار الديك الرومي رمز أساسي بالمائدة يلي بتجمع العيلة بعيد الشكر، وصارت وجبته الرئيسية جزء من التقاليد.

ومن ضمن الطقوس المتبعة بهيدا العيد، هو قيام كل رئيس أمريكي بالعفو عن «ديك رومي» وعدم ذبحه ليوم مماته، وبلّش هالتقليد من سنة 1989.

وهاي كانت قصة هالعيد، كل عيد شكر وأنتم بخير.