شو دور جمعية الإعلاميين الاقتصاديين بلبنان؟

بالوضع الاقتصادي والاجتماعي الصعب اللي عم يعيشه لبنان، يفترض يصير الإعلام الاقتصادي أداة أساسية لنفهم شو عم يصير بالبلد من ناحية المال والتجارة، ونواكب التطورات المحلية والعالمية.

من هون، تأسست جمعية الإعلاميين الاقتصاديين بلبنان لتكون منصة مهنية بتجمع الصحافيين المتخصصين، وبتقوّي دور الإعلام الاقتصادي بتوعية الناس وصنّاع القرار.

تأسست الجمعية سنة 2007، وهي مؤسسة مهنية مش هدفها تحقق أرباح، بل هدفها المعلن إنها تجمع الصحافيين اللي بيشتغلوا بالمجال الاقتصادي والمالي بلبنان.

وبتطمح كمان إنها توفّر بيئة داعمة لأعضائها من خلال التواصل والتعاون وبتسعى لتقدر تقدّم دعم مهني واجتماعي، سواء عبر التوجيه أو حتى مساعدات اجتماعية وصحية.

شو أهدافها؟

الجمعية عندها أهداف معلنة مش بالضرورة تحققت لأسباب عديدة مش هون مجال الحديث عنها، وأهم هالأهداف إنها:

• تجمع الصحافيين المتخصصين وتشتغل على تقوية العمل الجماعي.

• تقدّم مساعدات اجتماعية وصحية للمنتسبين.

• تساعد المهنيين اللي عم يفتشوا على شغل.

• تساهم بدعم الاستقرار الاقتصادي والتنمية المستدامة بالبلد.

• تقوّي علاقات لبنان الاقتصادية مع الدول والمؤسسات الدولية.

شو بتعمل الجمعية ومين عم يديرها؟

بنلاحظ إنّو الجمعية بتحاول تكون فاعلة بالمشهد الإعلامي والاقتصادي، من خلال تنظيم ورشات عمل، ندوات، ومؤتمرات بتناقش مواضيع اقتصادية مهمة. كمان بتشتغل على التواصل مع مؤسسات حكومية وخاصة، وزارت شخصيات عديدة أبرزها رؤساء الجمهورية جوزاف عون ورئيس مجلس النواب نبيه برّي ورئيس الحكومة نوّاف سلام، لتحكي عن الوضع الاقتصادي.

كما إنو الجمعية بتسعى لتتفاعل مع الأحداث الوطنية والدولية، وبتدين أي اعتداء على الصحافيين، وبتقدّم التعازي بوفاة شخصيات اقتصادية، وهاد الشي بيعكس نوعاً ما التزامها المهني والاجتماعي.

اليوم، بتترأس الجمعية الزميلة الصحافية سابين عويس، اللي انتُخبت لولاية تانية بشهر تشرين الثاني/نوفمبر 2023.

والهيئة الإدارية عم تركّز على توسيع عضوية الجمعية وتكبير شبكة علاقاتها وتقوية موقع الجمعية كمركز مهني للإعلام الاقتصادي بلبنان.

وهالهيئة الإدارية بتضم حالياً الزملاء:

• بهيج أبو غانم وباسل الخطيب كنُوّاب للرئيس

• عمر الناطور أمين سر

• باسم سعد مفوّض الجمعية عند الحكومة

• بيار سعد أمين صندوق

• رمزي منصور محاسب

• سلوى بعلبكي وباتريسيا جلاد مسؤولين عن الإعلام والانتساب

• ندين صموئيل وعمر الراسي مسؤولين عن العلاقات العامة

• سيمون شحادة مستشار

بالإجمال، الجمعية بتحاول تجمع الصحافيين الاقتصاديين، وبتريد إنها تشتغل على تطوير الإعلام المتخصص بلبنان.

دورها يفترض يكون أساسي بتوعية الناس وصنّاع القرار بالقضايا الاقتصادية، وكمان يفترض إنها تقدّم معلومات دقيقة وموثوقة بظل وضع اقتصادي صعب.

ومن خلال نشاطاتها وقيادتها، عم تحاول الجمعية تثبت إنها مش بس جمعية مهنية، بل شريك فعلي بدعم الإعلام الاقتصادي ومساندة الصحافيين، لتكوين مجتمع واعي ومتابع للتطورات الاقتصادية المحلية والعالمية.

لكن مهمتها بتبقى كتير صعبة بظل الظروف المحلية والإقليمية الصعبة، بس مع الإصرار والمثابرة ما في شي مستحيل.