10 خطوات لتخفف عن جيبتك فاتورة الكهربا

عم يعيش لبنان اليوم أزمة كهرباء كبيرة، كتير من البيوت صار اعتمادها الكامل على الموتيرات الكهربائية لتأمّن الطاقة الأساسية، و طبعاً في استغلال كتير كبير من أصحاب المولدات. هالوضع جاب معه غلاء غير مسبوق بأسعار الاشتراكات والفواتير، وخلّى كل عيلة تدور على طرق لتخفيف استهلاك الطاقة وتوفير مصاري.

لهيك قررنا نعطيك عشر خطوات بتساعد كل بيت يقلّل من سعر الفاتورة آخر الشهر:

1. اطفي الأجهزة يلي مش عم تستعملها مثل الكمبيوتر، التلفزيون، ليقل استهلاك الطاقة الكهربائية.

2. استغل الضوء الطبيعي بالنهار بدل من تشغيل مصابيح كهربائية.

3. استعمل المراوح بدل المكيفات إذا الجو مش كتير حار، لتخفف مصروف العداد .

4. عادةً أول ما يدور البراد على الكهربا، بيسحب كتير أمبيرات، وبعد شوي بيرجع استهلاكه طبيعي، لهالسبب ما الاحسن تتركوه و ما تشيلوه من الكهربا كل شوي بظنكم انكم عم توفروا.

5. استخدم لمبات LED بدل العادية، كتير موفّرين للكهربا.

6. حاول دوِّر القازان أو سخان المياة على كهرباء الدولة أخف كلفة من المولدات.

7. ابتعدوا عن النشافات و الجلايات و استعملوا بدائل أرخص متل الجلي اليدوي و منشر الغسيل أو استخدمهم بحكمة.

8.اغسل الملابس بالماء البارد بدل الماء الساخن لتوفير كهربا.

9. ركّز على استعمال المواقد مثلاً يلي على الحطب، المازوت، أو الغاز بدل الكهربائية بالجو البارد لتخفف مصروف عالجيبة.

10. إنتبه انت و عم تشتري الاجهزة اشتري الفئة الاقل صرفاً للطاقة.

بالاعتماد الكامل على المُولِّدات، كل خطوة بسيطة لتقليل استهلاك الطاقة بتفرق كتير. تطبيق هالأفكار رح يساعدك على توفير المصاري وتقليل الضغط على الموتور، خصوصاً مع الغلا المستمر وانقطاع الكهربا اليومي، وما تنسى إنو بساعدك تخبي إرشك الأبيض ليومك الأسود.