شو يعني التضخم وكيف بتتأثر الناس؟

التضخم يعني لما الأسعار ترتفع بشكل مستمر، يعني المصاري يلي معك عم تصير أقل قيمة وما عاد تكفي تشتري نفس الأشياء متل قبل.

وهالشي بيصير لعدة أسباب:

• المصارِي أكتر بالسوق: إذا الدولة طبعت مصاري أكتر، قيمة المصاري القديمة بتصير أقل، والأسعار بتطلع.

• الغلاء بتكاليف الإنتاج: لما البنزين والكهرباء أو المواد الخام تصير أغلى، بتضطر الشركات ترفع أسعار منتجاتها.

• الطلب أعلى من العرض: إذا كل الناس بدها تشتري نفس الغرض وما فيه كفاية، بيرتفع سعره.

بس شو تأثير التضخم على حياتنا اليومية؟

طبعا التأثير مباشر وبيظهر من خلال 3 أشيا أساسية:

• راتبك ما بيعود يكفي مثل قبل.

• الأشياء الأساسية مثل الخبز والبنزين والدواء والكهربا بتصير أغلى.

• والناس بتصير تحاول تدخر أو تستثمر مصاريها بمكان يحمي قيمتها.

مثال واقعي من لبنان

قبل أزمة أواخر 2019، كان سعر ربطة الخبز 1500 ليرة، يعني دولار واحد، هلأ صار سعرا 85 ألف ليرة، يعني أقل من دولار بشوي. بس المصاري يلي كانت تكفي تشتري خبز للشهر، هلأ ما بتوفيك إلا جزء صغير منه، لأن قيمة مدخولك بالدولار قلّت كتير لأن الليرة اللبنانية من وقتا لهلأ خسرانة 98% من قيمتها.

باختصار، التضخم هو لما المصارِي تصير أقل قيمة والأسعار ترتفع بشكل مستمر، وهيدا الشي بيأثر على القدرة الشرائية لكل واحد منا.