بتعرِف مين الرجل يلي بيملك أكتر من ٧٠ ماركة فخمة بالعالم؟

بيرنار أرنو (Bernard Arnault) هو رئيس مجموعة LVMH، أكبر شركة للمنتجات الفاخرة على الكوكب.

تحت هالمجموعة في أكتر من ٧٥ ماركة عالمية، من لويس فويتون وديور وجيفنشي، لـ تيفاني آند كو وبولغاري وفندي وسيفورا… يعني باختصار، إذا فكرتي بـ “Luxury”، أكيد وراه أرنو!

بيرنار أرنو ما ورث هالإمبراطورية، هو بناها خطوة بخطوة. بلّش بالثمانينات، وقت اشترى شركة “كريستيان ديور” لما كانت مفلسة تقريباً، وإستغلها كنقطة انطلاق.

من وقتها صار يتّبع أسلوب ذكي بالإستحواذ: يشتري ماركات عندها تاريخ قوي بس وضعها المالي مش كتير منيح، وبيعيد هيكلتها بطريقة تخليها ترجع تلمع بالسوق.

اليوم، قيمة مجموعة LVMH بالسوق أكتر من ٤٠٠ مليار يورو!

وبيرنار أرنو صار أغنى شخص بأوروبا، ومرّات بيتفوّق حتى على إيلون ماسك بثروتو يلي بتتعدّى ٢٢٠ مليار دولار حسب سوق الأسهم.

الإقتصاديين بيقولوا إنّو نجاح أرنو ما بس من الماركات، بل من طريقة إدارته للمخزون والأسعار.

هو ما بيخلي منتجاته موجودة بكل مكان، بالعكس بيخليها محدودة، ليضلّ فيها “ندرة”، وهيك الطلب بيضلّ أعلى من العرض.

وكمان ركّز على الإستثمار بالأسواق الآسيوية متل الصين وكوريا، يلي صاروا من أهم الزباين لهالماركات.

يعني إذا بدنا نحكي بالأرقام، مبيعات LVMH سنة 2024 وصلت لحوالي ٩٠ مليار يورو، والأرباح الصافية فوق ١٥ مليار رقم ضخم لعالم الموضة والرفاهية!

فـ إيّه… بيرنار أرنو مش بس تاجر فخامة، هو عبقري إقتصادي بيعرف كيف يحوّل “الستايل” لمليارات.