6 خطوات لتعيش حياة مريحة مادّياً

بهالأيام ومع تدهور الأوضاع الاقتصادية، الاستقرار المادي صار حلم لكل حدا منّا. بس هالشي مش مستحيل، في كم خطوة بسيطة إذا مشينا فيهن منقدر نبني حياة مرتاحة ونخفف التوتر المالي.

كتير منّا أول ما يقبض معاشه، ما بيمرّ أسبوع إلا وبيطير، ومنبلّش نسأل حالنا: ليه هيك بيصير؟ وشو لازم نعمل لنستقر مادياً ونبطل نعيش بقلق؟

مش ضروري تضل كل حياتك عايش بضيق وقلق مالي، لأنو فيك تغيّر الوضع بخطوات عملية. متل ما بيقول المثل: "إذا فات الفقر من الباب، بيهرب الحب من الشباك." يعني إذا بدك تبني عيلة وتعيش بكرامة، لازم ترتّب أمورك المالية.

وهودي 6 خطوات بيساعدوك تبدأ:

• نظّم مصروفك

قسم معاشك لثلاث أجزاء:

50% للحاجات الأساسية متل أجار البيت، كهربا، ميّ، وأكل.

30% للكماليات متل طلعَات، صالون، أو تياب.

20% إدخار، يعني لأي هدف بدك تحقّقو أو تسافر أو تشتري شي كبير.

هيك بتكون عم تمشي ع قاعدة 50-30-20 وبتسيطر ع مصروفك.

• دبّر ديونك بحكمة

إذا عليك ديون، في طريقتين لتسديدها

يا إمّا تبلّش بالأصغر فالأكبر، أو تبلّش بالديون يلي عليها أعلى فوايد لتخفف التكاليف. أهم شي ما تخنق حالك وتكون منظم.

• إعمل صندوق طوارئ

خلي دايماً قجّة صغيرة ع جنب، حتى لو بتحط فيها مبلغ بسيط كل شهر. هيدي بتساعدك وقت الشدّة أو بأي ظرف طارئ. وإذا عندك مصدرين دخل، خصّص واحد منهن لهالصندوق.

• ما تصرف فوراً بعد ما تقبض

دراسات بتقول إنو أول ما نقبض معاشنا، منعيش شعور إنو نحنا أغنياء ومنصرف عشوائي. جرّب تنطر 48 ساعة قبل ما تبلّش تصرف، رح تلاحظ إنك بتصرف بعقلانية أكتر.

• إبني عادات مالية صحيّة

خفّف الإنفاق العاطفي، والتزم بالميزانية يلي حاططها، وراجع نفقاتك آخر كل شهر لتشوف وين فيك توفّر شوي.

• ثقّف حالك مالياً:

إقرا كتب عن الإدارة المالية متل الأب الغني والأب الفقير أو سيكولوجية المال، أو إحضر دورات بسيطة عن التخطيط المالي. المعرفة هي أوّل طريق الراحة المادية.

بالنهاية، إذا اعتمدت هالخطوات الستّة بشكل مستمر، رح تقدر تبني أساس مالي قوي، وتعيش مرتاح أكتر، إلك ولعيلتك.