شو يعني إغلاق الحكومة الأميركية؟
عم تواجه أميركا بهالأيام أزمة مالية كبيرة. الدين العام وصل لـحوالي 36 تريليون دولار، ونسبة الدين للناتج المحلي الإجمالي بلغت تقريباً 98%، يعني الدولة مديونة تقريباً أد حجم اقتصادها.
أما العجز المالي فوصل لـ840 مليار دولار بأول أربع شهور من السنة المالية، وعم يشكّل حوالي 6.4% من الناتج المحلي، رغم محاولات وزارة الخزانة تخفيضه ليصير 3%.
هالأرقام بتفرجي أديش الوضع المالي بالولايات المتحدة حساس، وكل تأخير باتفاق الكونغرس على الموازنة بيهدّد بإغلاق الحكومة، وبيزيد الضغط على الاقتصاد الأميركي.
طيب شو يعني إغلاق الحكومة الأميركية؟
إغلاق الحكومة (Government Shutdown) بيصير لما الكونغرس الأميركي ما يقدر يوافق على قانون تمويل جديد يغطي مصاريف الدولة. يعني الدولة ما معها تدفع معاشات الموظفين أو تشغّل الخدمات، فبتوقف كتير مؤسسات حكومية عن الشغل.
متل كأنو الدولة سكّرت أبوابها مؤقتاً لأن السياسيين ما اتفقوا على كيف يصرفوا المصاري.
شو بيصير إذا صار إغلاق الحكومة الأميركية؟
لهالشي عدة تأثيرات حادة باقتصاد الولايات المتحدة ومجتمعها:
الموظفين الفيدراليين: قسم كبير منهم بينحطّ بإجازة قسرية بلا معاش، والباقي بيشتغل بس ما بيقبض إلا بعد ما ينتهي الإغلاق.
الخدمات العامة: بتوقف خدمات متل إصدار جوازات السفر وفتح المتاحف والمساعدات الزراعية وحتى بعض خدمات الصحة.
الاقتصاد: كل يوم إغلاق بيكلف الدولة ملايين الدولارات، وبيأثر على الأسواق والسياحة والمواطنين.
الناس العاديين: إذا بدّك تراجع دائرة حكومية أو تطلب مساعدة أو حتى تزور محميّة طبيعية ممكن تلاقيها مسكّرة.
ليه بيصير هالإغلاق وشو علاقته بالدين؟
الإغلاق بيصير لما الكونغرس ما يقدر يتفق على كيف يصرفوا المصاري، خصوصاً بظل الدين الضخم. كل حزب عنده أولويات: في ناس بدها تخفّف الإنفاق، وفي ناس بدها تزيد الدعم الاجتماعي. ولما ما يتفقوا، الدولة بتعلق والإغلاق بيصير وسيلة ضغط سياسية.
وكل ما زاد الدين والعجز بيصير الاتفاق أصعب، لأن كل دولار زيادة بيعمل جدل سياسي كبير.
صار قبل إنو الحكومة الأميركية أغلقت وشو كانت النتيجة؟
إيه، صار أكتر من مرة. أطول إغلاق كان سنة 2018–2019، ودام 35 يوم. الناس تأثرت والمطارات صار فيها إرباك كبير من تأخير وخلافه، والموظفين تعبوا كتير.
وكل مرة بيصير فيها إغلاق، الثقة بالدولة بتتزعزع والأسواق بتتوتر والدين بيكبر أكتر وأكتر.
وباختصار، إغلاق الحكومة الأميركية مش بس خلاف سياسي، هو نتيجة مباشرة لأزمة ديون عم تكبر، وعجز مالي عم يضغط على كل شي. وإذا ما نحلّت هالأزمة، ممكن نشوف الإغلاق يصير عادة سنوية، وكل مرة بيكون تأثيره أكبر على الناس والاقتصاد.